BooDy's HomePage

شفتوا العنوان؟ حاجه من بتاعة الأهرام و الأخبار، العناوين اللي ملهاش أي لازمه بس شكلها وراها كلام كبير أوي.

لسبب ما لا يعلمه إلا الله بقى النقاب دلوقتي "قضية" مهمة و كل الناس بتتكلم فيها، أفتح القناه الفضائيه ألاقي محمود سعد بيتكلم عن النقاب، أقلب على دريم ألاقي منى الشاذلي بتتكلم عن النقاب. و اكتر من جهة بدأت تمنع ارتداء النقاب فيها، المعاهد الأزهريه، المدن الجامعيه، و من فتره كانت وزارة الصحه منعته للممرضات، إلخ، إلخ، إلخ...

أنا أكيد آخر واحد يأخذ بآرائي في الدين أو بقناعاتي الدينيه بصفتي علماني فاسق مارق صهيو أمريكي شيعي و شيوعي مرتد علي اللعنه. فهذه التدوينه خاليه من أي رأي ديني. دي مجرد نظره تحليليه (أموت انا في الكلام الكبير) للوضع الحالي و مقارنته بوضع المرأه في مصر من حوالي قرن.

وجود النقاب في مصر بغض النظر عن علاقته بالدين شئ مستورد، قبل كده كان مستورد من السلطنه العثمانيه اللي صدرت لنا مبدأ الفصل بين الرجل و المرأه بصوره معينه و استمر الوضع بالصوره دي فيما يعرف بعصر الحريم لغاية أوائل القرن العشرين مع ظهور حركه تحرير المرأه و كتابات مرقص فهمي، محمد عبده، قاسم أمين، ملك حفني، هدى شعراوي، و غيرهم. أفكار الناس دي هي اللي حركت المجتمع المصري و وصلته لرفض التخلف و التمييز المنظم ضد المرأه .

النهارده وجود النقاب و انتشاره في مصر مرتبط بفكر مستورد للمره التانيه و هو حاليا الفكر السلفي، أسباب انتشاره في مصر مرتبط بالمد الوهابي من السبعينات لغاية النهارده و ده موضوع تاني.

لو تابعنا أفكار و آراء أكبر مشايخ السلفيه في مصر حاليا هنلاقي توجه عام لإعادة المرأه إلى عصر الحريم و فصلها عن الرجل في المجتمع، راجع آراء محمد حسين يعقوب، أبو إسحاق الحويني، محمد حسان، و غيرهم. نسبه كبيره من المتبعين للفكر ده في حالة فصام و تردد بين منظومه مصممه و لو بشكل صوري للمساواه بين الجنسين و دفع المرأه للمشاركه في المجتمع و بين ضرورة وجود هذا الفصل بناء على معتقداتهم الدينيه، علشان كده النهارده المنقبات موجودين في المدارس و الجامعات و في سوق العمل في مجالات كتيره و بيدافعوا عن وجودهم ده بشده و فعليا مفيش تعارض بين تغطية المرأه للوجه و الكفين أو أيا كان شكل النقاب طبقا لدعاته و بين مزاولتها لأعمال معينه.

في نفس الوقت مازالت نسبه كبيره من الإناث في مصر بتعيش تحت ضغوط و قيود أسريه و بيتحكم فيها فرد المعروف بالوصي عليها سواء كان الوصي ده أبوها، أخوها، خالها، أو أي ذكر تاني شائت الظروف إنه يصل لهذا المنصب. مش معنى كده ان كل واحده منقبه أو محجبه هي ضحيه للوصايه دي فأرجو من الإخوه الليبراليين أوي جدا خالص يعفونا من التعميمات. و برضو أرجو من الإخوه الإسلامجيه يعفونا من تجاربهم الشخصيه مع منقبات لهم حياه مستقله و بيختاروا النقاب لوحدهم و كإن الحياه لونها بمبي و مفيش أي مرأه مقهوره و مجبره على النقاب أو الحجاب.

منع المنقبات في أي مؤسسه مش حل لمشكلة فصل المرأه عن الرجل و عزلها عن المجتمع. المنقبه الغير مجبره على النقاب بتشارك في المجتمع بمحض إرادتها و بتعزل نفسها عن المجتمع بمحض إرادتها و أظن ده من حقها. أنا محبش ان يبقى لي علاقه بأي واحده بتنظر لنفسها على إنها قطعة من اللحم و فتنه لابد أن تستتر من الرجال بس على كل حال دي حريتها. لكن المنقبه المجبره على النقاب لما تمنع من ارتداء النقاب فهي بتمنع من المشاركه في المجتمع بأي صوره لسبب بسيط جدا إن الوصي عليها هيرفض خلعها للنقاب و هيقيد حركتها بشكل غير آدمي. فشئ طبيعي جدا إن أب يمنع بنته من الدراسه في الأزهر أو في المدرسه أو السكن في المدينه الجامعيه نتيجه لقرارات منع النقاب دي.

هتقولي بس في مؤسسات بتعمل على دعم المرأه و مفيش واحده مجبره على الخضوع لهذا الوضع الغير إنساني و سيطرة الوصي عليها، هقول لك ده كلام فارغ، منظمات حقوق الإنسان نصها منظمات ربحيه فاسده مبتعملش حاجه، مطبقي القوانين متأثرين بالتيار الديني و عمرهم ما هيقدموا مساعده لمرأه بسبب تعرضها لقهر ذكوري من الوصي عليها، عندنا في مصر كل سنه عدد ضخم من حالات العنف ضد المرأه و عدد قضايا بتوصل للمحاكم يتعد على الصوابع و اللي بيوصل للمحاكم ممكن كمان يبقى مهزلة زي إن أب ياخد سنه سجن بعد ذبح بنته.

أنا كشخص مصري نفسي ان التيار السلفي يغور في ستين داهيه و يبعد عننا بنقابه و بدقنه و بقرفه كله، لكن الأفكار تحارب بالأفكار مش بالمنع. المجتمعات بتتغير بس ببطئ، مصر الخمسينات غير مصر النهارده غير مصر كمان عشرين سنه علشان كده نفسي يبقى في صد للتيار السلفي اللي عامل زي السرطان في مجتمعنا. عمر الصد ده ما هييجي من الأزهر، الأزهر مؤسسه منهاره و فقدت مصداقيتها عند المسلمين في مصر فبالتالي الحرب الإعلاميه اللي الأزهر طرف فيها دي هتفشل في إقناع الناس، لو طبعوا مليون نسخه من كتاب الشيخ زقزوق مش هيكون ليهم تأثير ألف نسخه من شريط لمحمد حسين يعقوب. لو اتكلموا في قناة أزهري ليل نهار هيمسحهم محمود المصري بدرس واحد على قناة الناس. حرب غير متكافئة و نهايتها محسومه قبل ما تبدأ. و منع النقاب في أي مكان لأسباب غير عمليه هيكون جزء من الفشل ده و أذيه لبنات كتير هيكونوا ضحيه لأي صوره من صور المنع دي.

و بعدين من الآخر كده، واحده شايفه نفسها فتنه و جامده آخر حاجه و عاوزه تستخبى من الذئاب البشريه، احنا مالنا؟ كفايه هبل بقى، شكرا بس احنا فعلا مش محتاجين مساعده أكتر من كده في الوصول للهاويه.

تصبحوا على خير.