BooDy's HomePage

بقى لي كتير عاوز اكتب بس كل اللي عاوز اكتبه هيطلع حد يسب لي الدين علشانه و بصراحة ربنا الواحد مبقاش عنده نفس يتخانق مع كلاب السكك كل شوية. حتى التدوينة دي يمكن آخد لي عليها كلمتين في جنابي بس طز مش فارقة، كما قال رجل حكيم، ينعل ابوهم كلاهتهم.

يا سيدي بيقوللك ربنا خلقنا شعوب و قبائل علشان نتعرف و نظبط مع بعضينا و كده يعني. و خلقنا تيارات سياسية و ثقافية برضو بس علشان نسب لبعض الدين و كل واحد فينا يحس انه أحسن من اللي حواليه و ان هو اللي صح و الباقي كلهم ولاد كلب بهايم. و من كرم ربنا علينا انه وضع في كل بني آدم القدرة على انه يبص لكل البشر المختلفين عنه بفوقية و احتقار و كأنه هو المخلص اللي ربونا كلمه على موبينيل طول النهار ببلاش و اداله الكتاب (أيا كان لونه، أخضر، أحمر، شفتشي) اللي فيه الإجابة على كل أسئلة الكون.

كل شوية في قضية في مكان ما من العالم بيتحرك للشغل فيها مجموعة من البشر. و زي ما بيشتغل على القضية دي مجموعة من البشر بيطلع مجموعة تانية تسب لهم الدين لأنهم طبعا فاهمين اكتر و عارفين المصلحة فين. غزة تنضرب نلم لها تبرعات و نعمل قوافل لفتح المعابر يطلعوا الناس بتوع مصر أولا يشتموا في دين أبونا و يقولوا الناس بتوع فلسطين دول خولات و أرزقيه و بيعملوا سبوبة. البرادعي يظهر و الناس تلم له توقيعات و يهيصوا شوية علشان التغيير يطلع النشطاء الأجانب و بتوع الجامعة الأمريكية و وسط البلد يقولوا بلاش كلام فارغ سيبكم من الهبل بتاع التغيير ده و ركزوا معانا علشان غزة محتاجة لنا، أو يقول لك البرادعي ده عميل خليكم مع حمدين قذافي.

عندي سؤال بسيط جدا محيرني فعلا لإن أنا راجل واطي بقعد على جنب دايما اسب الدين لكل الناس و آخري لما بتعاطف مع أي قضية بتبرع ولو بجنيه و بقى لي سنين منزلتش الشارع اتظاهر و نشكر ربونا عمري ما اتسجنت يعني لا من الناس دول ولا من الناس دول فمعنديش خبرة النضال و النشاط. ايه المشكلة ان حد يبقى مهتم بقضية أكتر من التانية؟ ليه مش من حقي مثلا اني ابقى مش مهتم بقضية فلسطين ولا فارقه معايا و الأهم بالنسبة لي اني اتخلص من نظام مبارك؟ وليه مش من حقي اني ابقى مهتم بقضية غزة اكتر من التغيير دلوقتي لإن غزة بتعيش في ظروف غير آدمية و محتاجة مجهود أكتر دلوقتي؟
و خد دي بقى، هل يا ترى ممكن ابقى مهتم بالاتنين و اشتغل عليهم في نفس الوقت ولا مينفعش؟ يعني ينفع اتظاهر علشان الحد الأدنى للأجور في مصر و اطلع في قافلة علشان فتح معبر رفح ولا النشاط بيبقى بكارنيه مختوم من وكيل التيار السياسي اللي انت تبعه؟

حقيقي بتخنق و بتضايق لما حد بيزعق لي علشان مش مهتم بقضيته حاليا أو لإني مركز أكتر في حاجة بتحصل دلوقتي قدامي، و بتضايق أكتر و أكتر لما بيبقى الحد ده انا بحبه و بحترمه. على عيني و على راسي المسجد الأقصى بس بصراحة انا مش مهتم بيه النهاردة قد ما انا مهتم اعرف مصير كاميليا شحاتة و افهم مدى سلطة المؤسسة الكنسية في مصر و قدرتها على اختطاف البشر عيني عينك.

مين اللي بيدي الناس حق الوصاية على اهتمامات الغير؟ التاريخ النضالي؟ انت بتناضل من زمان يبقى لك الحق انك تقوللي اعمل ايه و معملش ايه علشان انا مبتدئ نضال؟ اعتقد ان في مصر محدش له الحق اطلاقا انه يتسند على تاريخه لإن الحمد لله كلنا فاشلين و كل النجاحات اللي اتحققت صغيرة جدا و الدليل قدامنا، بص حواليك و انت تشوف حالنا عامل ازاي. شفت أحمد فؤاد نجم مره في برنامج بيعتذر للشباب علشان فشل جيله كان سبب في اللي احنا فيه النهاردة. واحد زيه لازم يحط رجل على رجل و ينظر على دين أبونا طول الوقت بسبب الخبرة النضالية و سنين المعتقل.

والله العظيم دي حاجة تفلق و تنكد على الواحد و تكرهه في انه يتنيل يعمل أي حاجة في البلد دي طالما أي حاجة هيعملها هيلاقي حد يشتمه و يقول عليه اهبل و مش شايف "الصورة الكاملة".

ملحوظة: انا بطلت انشر أي تعليقات بتيجي علشان معظمها بضان و محتاجة وقت علشان افلترها و أصلا بقى انا مقتنع اني بفهم احسن منكم كلكم يا أوغاد فمش هقبل بأي رأي تاني و كل سنة و انتوا طيبين