BooDy's HomePage

انا متنرفز جدا من الوضع الحالي و متلخبط في نفس الوقت. و عارف ان توقيت كتابة الكلام ده هيكون مستفز لبعض الزملاء الثوريين الراديكاليين و غالبا هبقى متهم بإني جبان أو خائن أو بعرص للجيش بس فعلا مش قادر اسكت اكتر من كده.

من بعد إقالة أو استقالة حكومة شفيق و تعيين عصام شرف كرئيس للوزراء و لغاية دلوقتي و بعض الثوار مصممين على الاصطدام بالجيش و المجلس العسكري. و المطالبة برحيل المشير طنطاوي بقدرة قادر أصبحت دلوقتي على رأس أولويات الثوار.

أنا شايف ان دي معركة غلط و في توقيت غلط و مضرة للثورة جدا للأسباب التالية:

خلينا نرجع خطوتين لورا و نخرج من إشكالية إذا كان المشير فاسد ولا مش فاسد. ولو ان خطر علي اني افترض انه فاسد أحسان يحصل لي زي ما حصل لمايكل نبيل بس هنفترض انه فاسد. خلينا نرجع كمان 7 سنين لورا في بدايات حركة كفاية. حد فاكر لما كنا بنقول لا للتمديد لا للتوريث؟ لما كنت بتخرج بره دايرة النشطاء و المثقفين و تنزل الشارع تتكلم مع الناس كنت بتصطدم بحقيقة كتير مننا كان بيتجاهلها و هي إن في ناس كتير جدا ميعرفوش ان مبارك فاسد أو خرب البلد، مش بس كده لا ده في ناس كتير جدا كانوا شايفين ان احنا اللي بنخرب البلد علشان لما بنعمل مظاهرة بنوقف لهم الطريق و بقدرة قادر ساعة المظاهرة كل عيانين البلد بيبقوا محتاجين يعدوا من مكان المظاهرة علشان يروحوا المستشفى!!

مفاجأة الموسم بقى ان الصورة دي لسه متغيرتش عند كل الشعب، و هنا انا بتكلم عن المواطن الغير مسيس و الغير مستفيد بصورة مباشرة أو غير مباشرة من نظام مبارك، يعني محدش ييجي يقوللي ان محدش شايف ان مبارك ملاك غير البلطجية، تبقى بتستعبط. بقى لنا سنين بنصوت و نشد في شعرنا زي المجانين علشان الناس تسمع و لسه منقدرش نقول بضمير مستريح ان في إجماع شعبي ان مبارك هو رأس الفساد في مصر.

ده مبارك اللي الفساد بتاعه وصلك و انت قاعد في بيتك مخرجتش منه، وصلك في الأكل و الشرب. طيب هتقنع ازاي الملايين ان في فساد في المؤسسة العسكرية و إن المؤسسة دي زي أي مؤسسة تانية في الدولة الفساد ممكن يكون وصل لها في عهد مبارك؟ المؤسسة العسكرية اللي عندك سياسيين ولا مؤاخذة في اللفظ بقى لهم سنين بيستحلموا على اليوم اللي تتدخل فيه للقضاء على النظام الحاكم، المؤسسة اللي في نشطاء كانوا معاك في الشارع من يوم 25 لغاية ما مبارك تنحى ولا يمكن تشكك في نواياهم و ذمتهم و إخلاصهم بيدافعوا عنها باستماتة في الرايحة و الجاية، المؤسسة اللي صورتها واحدة من الثوابت زي ربنا كده في عقل الشعب المصري بكافة طوائفة و مستوياته الاجتماعية.

مش معنى انك انتصرت في 25 يناير لما وقفت في وش الطوفان انك هتنتصر لما تقف في وش أي طوفان. افتكر انك انتصرت في 26 و 27 و 28 بإرادة الشعب لإنه وقف معاك و في صفك مش انتصرت بعنتريتك و كفاحك لوحدك. و لو شتمت الشعب دلوقتي و قلت انهم بهايم تبقى انت اللي بهيم لإنك مش قادر توصل لهم و مش فاهم العوامل اللي بتأثر في وعيهم

اعتصام 1000 من الثوار في ميدان التحرير مش زي اعتصام مئات الآلاف في التحرير و السويس و اسكندرية.

هل تعلم يا سيدي الفاضل اننا مازلنا في ناس وسطنا مصدقين تماما إن التحرير كان فيه مخدرات و علاقات جنسية كاملة؟ هل انت متصور انك هتكسب تعاطفهم لما تضرب في الشئ الثابت الوحيد اللي فاضل لهم؟ طب بلاش دي، هل انت متصور انك هتكسب تعاطفهم لما تقفل ميدان التحرير بأسلاك شائكة مع العلم ان الإعلام زرع عندهم ارتباط دين أم سير المرور في دين أم الميدان ده باستقرار البلد و بدوران دين أم عجلة الانتاج؟

إذا باستمرار الاصطدام مع الجيش بنفقد تعاطف الشارع و بنوسع الخندق اللي بيننا و بين المواطنين.

حاجة تانية، زمان أول ما نزلت مظاهرات كنت عيل ورور حلو كده و بقول بالروح بالدم نفديك يا إسلام و نستشهد بقى و حركات من دي بس كانت مفاجأة لما علموني حاجة لطيفة أوي: مش شطارة ولا جدعنة انك يتقبض عليك. لما بيتقبض عليك بيتصرف عليك فلوس إعاشة و مجهود محامين بيجروا وراك و أهلك بيتشحططوا و كمان ممكن تخوف الناس من النزول للشارع لو كنت في وقت معين محتاج لحشد كبير.

طيب، دلوقتي احنا عارفين ان الشارع في صف الجيش و مش هيدافع عنك، بالكتير أوي هيتعاطف معاك. و انت قدرتك على الحشد مقدرتش تجيب للاعتصام ده 10000 واحد، يعني بقيت مجموعة بسيطة سهل قمعها. بغض النظر عن السبب، سواء كنت مقتنع ان الجيش متواطئ أو خائن أو بيشتغل للحزب الوطني أو ان في أيادي خفية بتسبب وقيعة بين الجيش و الثوار أو ان الجيش مهووس بالاستقرار و دي الطريقة الوحيدة اللي بيعرف يتعامل بيها مع أي شئ "غير مستقر"، في الآخر النتيجة واحدة و هي انه سيتم قمع الاعتصام و سيتم القبض عليك و يمكن تتعذب و تاخد حكم عسكري كمان. قول علي جبان أو عيل مستقر براحتك، بس انا افضل المجهود اللي النشطاء هيبذلوه علشان يطلعوك يتوجة لبناء قاعدة شعبية أوسع علشان نبقى جاهزين للانتخابات القادمة. و دلوقتي و احنا بنتخانق و بنشتم في بعض القوى السياسية القديمة بتجهز نفسها للانتخابات دي و احنا بنخون في بعض و بنشتم في بعض و جزء مننا مهدد بالقبض عليه في أي لحظة.

غير كده تعالى نفترض ان احنا فعلا بنحارب المجلس العسكري، طول ما انت بتدخل في معارك انت عارف و متأكد انها خسرانة فمع كل خسارة انت بتقوي موقف خصمك. ممكن تقول لي طبعا انك مع كل خسارة بتزود تعاطف الناس معاك و خصوصا لو انت قدمت مثال في التضحية و الفداء، ساعتها هقول لك الحقيقة المرة ان التاريخ يكتبه المنتصرون، كل ما خصمك بينتصر بيكتب هو المعركة زي ما هو عاوز، يعني انت هتضحي و تحاول تبني تضامض شعبي هيدمره هو في لحظات لإنه يقدر يطلعك بلطجي و عدو الاستقرار و موقف دين أم عجلة الانتاج و هو عنده المصداقية انه ينقل الصورة دي للأغلبية العظمى من الناس، يعني ده مش مبارك اللي بقى له 30 سنه بيكذب.

هل المؤسسة العسكرية محتاجة إصلاح؟ معرفش، أنا مش جزء منها علشان اقدر اقول الكلام ده (و انا مدرك الكلمة دي مستفزة قد ايه للراديكاليين و بسببها بالذات هيقولوا علي معرص). هل المؤسسة العسكرية غير قابلة للنقد؟ لا طبعا قابلة للنقد، اكتر حاجة احنا في حاجة لها هي اننا نبطل نبني أصنام و نعبدها علشان توصلنا للخلاص. كل الأشخاص و الأجهزة قابلة للنقد و الحساب و العقاب كمان.

أي حد استخدم العنف ضد مواطن مصري لازم يتحاسب و مش لازم نسكت على حقنا في اننا نعيش بكرامة، الشهداء ماتوا علشان الكرامة مش بس لقمة العيش. لازم نضغط علشان المجلس العسكري يحاسب الظباط اللي استخدموا العنف و عذبوا المواطنين خلال الأيام اللي فاتت. و ممكن تحقيق ده بدون الدخول في صدام صريح مع المجلس.

و الأهم من الخناق مع المجلس العسكري دلوقتي هو حاجتين، أولا الضغط من أجل حل الحزب الوطني و منع كل أعضاءه من المشاركة في الحياة السياسية للأبد لإن طول ما في 3 مليون عضو في الحزب الوطني عندهم أمل في التواجد في اللعبة هيفضلوا بطرقهم القذرة يخربوا و يضربوا في الثوار و في أي حاجة بيعملوها الثوار و انا مقتنع جدا ان جزء من (و ليس كل) المشكلة مع الجيش هو ان في ناس من مصلحتهم قمع الثوار و ضربهم باستخدام الجيش. مش حابب ابالغ و استخدم جملة الثورة المضادة بس ده جزء من المشكلة و الحل الوحيد هو القضاء على أي أمل لهؤلاء الكلاب في الرجوع للسلطة. و ثانيا العمل على بناء الأحزاب الجديدة و النقابات العمالية و الطلابية المستقلة و التجهيز من خلالهم للانتخابات البرلمانية. هذه الكيانات هي الأمل في استمرار الثورة و انتصارها و تثبيت أقدامها مش بس محاسبة رموز الفساد في نظام مبارك.

أنا قافل التعليقات على المدونة لأسباب تقنية بحته، آسف حقيقي، ممكن تشتموني براحتكم على تويتر أو فيس بوك، هذا و الله الموفق و تصبحوا على خير