BooDy's HomePage

حضرات السادة اللواءات، بعد التحية و هز الطرية انا في حاجة واقفة في زوري نفسي اقولها. انا مش هتكلم عن بلالين الاختبار اللي كل شوية بتطلع علشان تجس نبض الشارع، ولا هتكلم عن المحاولات المستميتة لمساعدة حسني مبارك على الهروب من العقاب هو و أولاده ولا هتكلم عن سياسة العظمة اللي بترموها لنا كل شوية علشان تهدوا الشارع (آخرها حكم غيابي على أمين شرطة بالاعدام في جريمة قتل المتظاهرين، يا فرحتي و الظباط و اللواءات المتورطين في قتل المتظاهرين لسه موجودين في الداخلية عادي جدا ولا كأن في أي حاجة)

انا مش هتكلم عن ده خالص ولا هجيب سيرته بتاتا، برغم كل اللي بيحصل مش عارف ليه نازل علي كمية تفائل غريبة بتخليني استحمل الهطل ده كله، يمكن علشان عندي ثقة في ان الشارع هينتفض تاني وقت اللزوم و هيطبق عدالته بنفسه على كل اللي هيخونه و يبيع ثورته....و ربنا ما يوريكم عدالة الشارع، ده عدالته العن من عدالة محاكماتكم العسكرية للمدنيين. انا قلت لكم اهو و عقلكم في راسكم تعرفوا خلاصكم. و صدقوني انا لا امثل الشارع خالص، مطلقا، أبسولوتلي، انا عيل سيس من بتوع النت دول. الشارع ده هو اللي قلع الداخلية ملط و جراهم في الشوارع باللباس لا مؤاخذة.

بيقول لك لا تبطلوا صدقاتكم بالمن و الأذى،انا بس عاوز افكر حضراتكم انكم لم تقوموا بالثورة، و لم تحموا الثورة، فانتوا أصلا ملكمش الحق انكم تمنوا علينا باي حاجة حقيقي، انتوا أصلا لم تتصدقوا بأي شئ.

يوم موقعة الجمل كان أسوأ يوم لي طول الثورة، استريحت لما تليفوني فصل شحن علشان مكنتش قادر ارد على حد منغير ما اشتمه و اقول له انزل يا خول الميدان، الثورة بتموت، كان أسوأ يوم علشان لساعات كان مسيطر علي فكرة واحدة بس، ان الثورة ممكن تنهار دلوقتي. كنت مصاب و دايخ و تعبان و شايف المعركة بتحصل قدامي و كل شوية واحد صاحبي بييجي من الجبهة شايلينه يا اما ماشي بالعافية بسبب الاصابة.

كنا محبوسين في الميدان مش عارفين نخرج ولا ندخل، اللجان الشعبية في المناطق المحيطة تحولت للجان بلطجة عاوزة تقضي على الثورة و تفضي الميدان بأي طريقة.

و في أثناء هذه المعركة الجيش كان فين؟ كان واقف بيتفرج علينا و احنا بنتقتل برصاص القناصة (اللي فجأة اختفوا و كل أجهزة الأمن في البلد بقى معندهمش أسلحة قنص أصلا، عاتشي جدا جدا)، و المولتوف و الطوب. حضراتكم مرفعتوش شماعة ولا حدفتوا مشبك غسيل حتى تدافعوا بيهم عن الثوار. و الراجل اللي طلع من الجيش و دافع عنا كان بيخالف الأوامر و كان ممكن لو الثورة فشلت يتخبط له حكم اعدام ولا حاجة.

عزيزي المجلس الأعلى، الناس بتقول ان جالكم أمر بالضرب في الثوار و انتوا رفضتوا، لو الكلام ده صحيح ما تقولوه و النبي و تثبتوه على مبارك علشان ياخد هو حكم الاعدام اللي يليق به، ولو الكلام ده مش صحيح بلاش والنبي نبرة انكم اصحاب فضل علينا ولازم نسمع كلامكم و نحط الجزمة في بقنا و نسكت علشان الواقع اللي قدامنا بيقول انكم ضربتوا الشعب لغاية دلوقتي أكثر مما ضربتوا نظام مبارك و حاكمتم ثوار أكثر مما حاكمتوا رموز نظام مبارك.

أعزائي رجال القوات المسلحة، للمرة الثانية بفكركم، الشارع طلع أذكي و أقوى مما يمكن أن نتخيل، أي حركة غدر هيكون عواقبها وخيمة، الشعب مش هيستنى 60 سنة كمان علشان يحصل على حريته و ياخد حقوقه و يعمل ثورة تانية. أي خيانة لطلبات الثورة انتوا أول ناس هتدفعوا ثمنها، الدولة هتنهار صحيح بس الناس هتحقق العدالة بإيدها و هقول لكم تاني ان عدالة الشارع هتكون وحشة أوي المرة دي، مش هيكتفوا انهم يقلعوا جهاز سيادي بحاله و يجروه ملط في الشوارع، ساعتها في ثواني هينصبوا لكم مقصلة في ميدان التحرير، ده شعب صايع و نصه صنايعية ايدهم تتلف في حرير.

مع خالص تحياتي