BooDy's HomePage

فوطة صفرا، خرقة، هرمة، أو شرموطة. كلها مرادفات تستخدم حسب الموقف و الطبقة الاجتماعية للقائل لوصف قطعة من القماش تستخدم لمسح أي قذارة تلاقيها قدامك. غالبا بتستخدم الفوطة الصفرا و ترميها على جنب لغاية ما تتبهدل تماما فلو كنت غلبان على قد حالك هتغسلها و تعيد استخدامها أما لو كنت مقتدر و معندكش أي اهتمام ولو شكلي بتوفير المصادر الطبيعية هتبص للفوطة بقرف بعد ما تتوسخ و تمسكها بطراطيف صوابعك أو باستخدام منديل كلينكس من ابو ريحة و ترميها بره عربيتك و عند أول إشارة هتنده للشاطرة (ايه شاطرة دي؟؟؟ قالشه فشخ و هربانة من الاربعينات طحن و عليها تراب) اللي واقفة عندها و تشتري منها فوطة جديدة.

أهم خاصية في الفوطة الصفرا ان مش مهم أوي يجرى لها ايه، عواقب استخدامك ليها بأي شكل مش حاجة مؤثرة في حياتك. فيها ايه يعني لما تتشحم ولا تغرق تراب و بعد كده ميه فتطين. مش فارق أوي، هترميها على جنب لغاية ما تحتاجها تاني أو تجيب واحدة تانية (راجع الفقرة السابقة). هي معمولة علشان كده، علشان تبقى مفيدة و في نفس الوقت مش خسارة كبيرة لو باظت و رميتها و لو انها صعب تبوظ على فكرة، دايما ممكن تغسلها و ترجع تستخدمها تاني لو مكسل تشتري واحدة جديدة. هتستحمل المية الساقعة و الصابون و هتنضف و تجلي النفس و الضمير و ممكن مليون واحد يستخدمها، سلفها لاصحابك و حبايبك و قرايبك و عمرها ما هتشتكي ولا تفتح بقها. هي معمولة علشان كده و متعودة على كده.

ألا هي ليه صحيح اسمها فوطة صفرا مع إن لونها برتقالي؟ كل الناس عندها عمى ألوان ولا انا اللي عندي مشكلة في التفريق بين الاصفر و البرتقالي؟ مهو أصل كود الهيكس بتاع البرتقالي غير بتاع الاصفر تماما ولا يكونش الكومبيوتر كمان بيغلط؟ أحيه لو الكمبيوتر بيغلط إنها المهانة و الاستهانة. حقا إنه أمر بضين.